نشر سمو الشيخ ناصر بن حمد آل خليفة ممثل جلالة الملك للأعمال الإنسانية وشئون الشباب، قصيدة وصور تجمعه بسمو الشيخ محمد بن زايد آل نهيان رئيس دولة الإمارات العربية المتحدة الشقيقة في حساب سموه الشخصي على «الانستغرام».

وقال سمو الشيخ ناصر بن حمد آل خليفة في القصيدة:

وشلون اعزي في خليفه الامارات



وحنا تقاسمنا الحزن بالنصيفه

لكن عزانا فيك ياطيب الذات

يامحمد اللي كل طيب حليفه

انا اقول انك ختمت البطولات

ماعاد باقي مجد غيرك يضيفه

بينك وبين منافسينك مسافات

فالعالم اجمع، والنوايا نظيفه

انت الذرى وانت الذخر فالمهمات

لاقيل وين اهل الامور الكليفه

وانت التواضع وانت صدق العلاقات

وانت المبادي وانت شوق العفيفه

وانت الكرم وانت الوفا والمروات

وانت الشجاعه والسيوف الرهيفه

الناس تشهد لك على مر الاوقات

والارض تشهد والجبال المنيفه

سقم العدو ستر البني العفيفات

قلبك عطوف وبطش كفك عنيفه

حققت بافعالك كبار الطموحات

وتشوفها مجرد اشياء طفيفه

شعبك يشوفك صانع المستحيلات

ويبايعك قبل الخبر فالصحيفه

علمتهم كيف اتخاذ القرارات

وقت الظروف الكايده والمخيفه

وعلمتهم وشلون تنحل الازمات

الين خليت الثقيله خفيفه

هذي بلادك في جميع المجالات

دايم وهي الاول ماترضى وصيفه

تقول من فوق الجبال المنيفات

انا اشهد ان لك ياخليفه، خليفه