بالبحريني

بحاجيكم اليوم بالبحريني مقالي اليوم من قاصي قلبي، ما ابي ازينه و لا حتى ابي اراجعه ويمكن ينزل باغلاطه لاني بكتبه سنه وحده.يوم السبت نبي شوارع البحرين كلها تحجي بحريني، نبي بيرق البحرين على كل بيت و كل سياره، نبي العلم معلق على كل جتف وقميص وكل ثوب وكل عباية. نبي عيالنا يشوفون منظر يحازون فيه عيالهم لي كبروا يقولون لهم شسووا أمهاتهم وأبهاتهم يوم 22 نوفمبر في 2014، نبي صورنا في هاليوم اتكبر وتنحط في فريم واتعلق في البيوت وعيالنا يحتفظون ويحفظون هالصورة تراه هالصورة بتحجي حجي عقب سنين، تراها بتقول حق أجيال يايه شوفوا ذي اليوم اللي حجه فيه أهل البحرين وقالوا لبيه يا بحرين لبيه يا أرض ضفتنا لبيه يا ماي سقانا ولبيه يا تراب حفنا.نبي اللي يايينا من بره يشوفون شعب البحرين يوم 22 ويشوفون حبنا لهالوطن حتى من غير ما نتكلم نبي البيرق البحريني العلم البحريني هو اللي يحجي عنا، هو اللي يرد نيابة عنا على اللي حلموا إنهم يصفرون الصناديق، شوفوا علم البحرين هو اللي بيقول للعالم كله شيبون هل البحرين ووين هواهم ووين أرضهم ووين سماهم. نبي نسمع صوت أهل البحرين يوصل حق اللي قال عنهم إنهم مقاطعين ابي أسمع صوت حريمها ابي اسمع صوت شيبانها ابي أسمع صوت رجالها شبيقولون له ووين بيكون الرد.صج ديرتي صغيرة و صج احنا على قدنا لكن بلاك ياللي تحرشت في هالصغيرة ما دريت وين قوتها؟ قوتها في شعبها قوتها باهلها قوتها بوحدة ترابها قوتها بعيالها واللي يتحداها ما عرف ان هالتحدي هو اللي قواها.والوعد عند صناديق الانتخابات، الوعد بصناديق هي اللي بتقول لك إن البحرين عصية عليك يالي بغيتها لها السو.(ملاحظة لغير أهل البحرين الرجاء سؤال أقرب بحريني عن بعض المصطلحات).