حب الجزيرة في ضميري مقدس
ماهمني لو بعضهم عنصرية
معشوقتي اللي انغرس عشقها غرس
في خافقي مالونها مذهبية
أحبها وهايم بها ومتنوّس
كيف أبدوي في دلة شاذليه
اللي يقول إيقول خله يهلوس
بس لا يزايد على الوطن والهوية
منه شربنا وخبزنا به أمغمس
حاشا نخونه لا ورب البرية
وحب الخليفة في ضميري تكرس
فديتهم أهل النفوس الأبية
يابوعلي والله فيك أتنفس
الناس عندك كل أبوها سوية
يابوعلي بعض الخلايق أمطمس
عمي نظر لو يدّعي المنطقية
لي شفت هداته تقول إمتحمس
إيمثل أنه له مواقف قوية
تاجر سوالف بالتجارة امتمرس
ما يدري إن بضاعته منتهيه
أقصد البعض اللي لسانه مدنس
ويقط على أبناء الوطن بالأذية
وقت الرخا يقول هذا (مجنس)
ويوم أن فزعنا للوطن ( بلطجية )
أقولها وأفخر بها ما أتدسس
أصلي بدوي وجنسيتي خليفيه
أخذتها بالطيب ما أخذتها بدس
لي الشرف بـ إرادة(ن) أميريه
ما أبيعها لوكان جيبي مفلس
نفسي بحكام الجزيرة غنية
اللي لهم نهـج قديم يدرس
لا فرق بين العائلة والرعية
لو كشّرت أنيابها الروم والفرس
بقدرة الله ما يجينا أسيه
من أولٍ بالسيف والرمح والترس
كانت ولازالت عليهم عصية
أقولها للي أفكاره اتوسوس
خل التوسوس ياردي السجية
كلنا واحد لو بعضهم تحسس
عرب عرب ما ندعي اليعربية
حب الجزيرة والخليفة إمقدس
ما همنا لو رمسهم عنصريه
هذا الوطـن أغلى علينا من النفس
وعار(ن) على اللي ما يشوشه حمية
