قصيدة مرفوعة إلى صاحب السمو الملكي الأمير خليفة بن سلمان آل خليفة رئيس الوزراء

يا خليفه
يا نهر ماشي
لك الحكمه ضفاف
يرتوي من رايك وشورك
هل البحرين
هللي في مدى اللحظه يحبونك
عدد ما تنفست موجه ف بحرها
او عدد صوت الهوا في الدنيا طاف
شللي يرعبنا ومن شنهو نخاف
واحنا في ظلك خليفه
*****************
نزرع الفرحه على كل المدن وياالمواني
شللي يرعبنا ومن شنهو نخاف
واحنا في ظلك خليفه
نقدر نخلي العمر ينبع بساتين المعاني
شللي يرعبنا ومن شنهو نخاف
وإحنا في ظلك خليفه
بالعدل والحب نحقق لنا كل الأماني
يا خليفه
العظيم اللي وقف ريال في وقت الشداد
يبقى وين ما يكون في الدنيا عظيم
والحليم اللي
دهر معروف في كل المواقف
ما نسى لحظه وهو بين الغضب
انه حليم
*****************
وانته والله بو علي
إنسان في الدنيا عظيم
في سكوتك في كلامك
في حضورك في سلامك
في مواقف
ما وقفها في العمر أي لحظه غيرك
انته إنسان عظيم
انته من عمر لنا الديره
وخلاها نعيم
انته هندست المحبه
في شوراعنا
وسواحلنا
وخليت الصعب يسهل
أمام الطيب والقلب الحنون
والشديد اللي يخاف الناس منه
*****************
لو يشم صوتك وحسك
آخر الديره يهون
وانته تدري
الحكيم الصح
لو جابل بحر فوضى
ابد ما شال من قلبه السكون
وشكثر في الديره حالات ومشاكل
ما لها غيرك خليفه
وشكثر أيام صعبه
ما يحلها غيرك انته يا خليفه
الزمان اللي نعيشه اليوم
حلمك من سقاه
والأمان اللي تعيشه الديره
حبك يدفعه ويمشي وراه
يا خليفه يا المهندس
*****************
انته فصل وإحنا نلبس
من اجل ديرة محبه
من اجل ديرة أمان
احنا شعبك
احنا في الديره يمينك
في العمر نمشي على شورك
ودستورك
وتفكيرك
إلى ابعد مكان
شعر: علي الشرقاوي