البحرين هي لحن السما في الأرض
البحرين هي أجمل علاقة ماي يحضن ماي
البحرين سر البسمة بين النبض
البحرين صوت المعنى في معناي
ما هي بس جزيرة حب
ولا هي زعفران القلب
البحرين أسرار الكواكب تجري بين حشاي
البحرين هي صوتي وما في صوت يشبه صوت
البحرين هي بيتي ولا في بيت يشبه بيت
البحرين هي ريحة هلي وناسي
وهي إحساس ما يشابه سوي إحساسي
وإحساسي محبه كون يجري في مدار دماي
البحرين
والله من أفز من دفوتي في النوم
اشكر ربي وأشكرها
واشكر كل هواها اللي كبر وياي
في الفرجان
وإلا ف روح برايح حب
محد في الزمن يدري
كيف واشلون
كل الكون يسكن في أغانيها
واشكر ذرة اترابه نمت ويا الهوا فيها
واشكر لي شتاي اللي ترك نفسه وأشغاله
وجا البحرين يحضن كل أراضيها
واشكر لقمة وشقد ناس سووها
حتى توصل اللقمه إلى حلجي
وان شافت على هالارض أي احلوج جوعانه
تهد كل شي
وتوقف وقفة الإخلاص
من حبها تشبعها وتعدلها وتداويها
واشكر كل شوارعها وقهاويها
واشكر حكمة القاده
واشكر مرتي واعيالي
واشكر نعمه خلتني
أحس إني
وسط كل البشر أعيش
في طول العمر أفضل
وقلبي حب
وصوتي حب
ولوني حب
و أحيا في زمان أجمل
زمان ما ينتهي
و اقف يهز الموج في ساحل ثوانيها
واشكرني وأنا أتسمع
كلام الخير يصعد من ضوا أحفادي
سمعوني يا أهل الطيب
مهما أغيب سمعوني
البحرين ماضيها وحاضرها واتيها
ما أظن يوم قد ما هي عطتني الحب أعطيها
البحرين تاريخي وكل حبي
وما في الحب نص ونص
ولا أظن ينقسم لاثنين
أقول للي مضى والجاي
أقول حق بايع وشراي
أقول للأرض
أقول للجو
أقول للماي
في حب الوطن ما في ابد
وجهة نظر أو راي

شعر: علي الشرقاوي