قصيدة مرفوع إلى سـيدي صاحب السمو الملكي الأمير خليفة بن سلمان آل خليفة رئيس الوزراء حفظه الله ورعـاه.

خليفة الحكمة الخضرة
خليفة يا نهار الخير
يروي كل هل الديره
خليفة يا ملاذ الناس
وأحلام الكثيرين اللي يتمنون
يلقون الوطن ماشي
مع نجم الثريا وآخر الأفلاك
خليفة الرأي
وأجمل من طرح في ميلسه الفكرة
وين ما تكون الله يحفظك
وبعزته يرعاك
خليفة يا سمو الطيب
من غير شك وإلا ريب
إحنا في العمر مثل الهوا وياك
نرويك بمحبتنا
ونشيلك في وسط العين
ونحطك مع نبض المشاعر
يا سمو الحب
فينا يا خليفة كل نفسْ
مر في الصدر يهواك
وشعبك هاللي تسكن ف وسط قلبه
يحبك حب
ما أظن في الزمن مثله
حب إنسان والله
يا خليفة مثلك وشرواك
إحنا في العمر وياك
ويا اللي عطي الديره
ندى أحلامه
وحرك فيها كل ما هو حلو
مر في مدى أيامه
خليفة إنته كتاب الطيب
وين ما في الوطن نلقاك ونشوفك
خليفه إنته كتاب الطيب
وإحنا في الحياة حروفك
نشوف العيد
أي مره نلامس فيها كفوفك
عطيت الديره كل حبك
وحبك بالمثل شعبك
والله وش وسع قلبك
كفايه نشوف
فرحة من نجح من شعبك المعطاء
هو كل فرحتك والبسمة في دنياك
صريح إنته في أقوالك
وتشهد بالصراحة العودة أفعالك
وفي حب الشعب والمملكة والله ما تبالي
ومن أجل العدل والله ما تفكر
سوى برب السما اللي من نداه أعطاك
خليفة في البعد لا تطوّل الغيبات
من غيرك خليفة والله ما تحلى سوالفنا
ولا في واحدٍ مثلك بكل إحساسه يسمعنا
خليفة في البعد لا تطول الغيبات
من غيرك خليفة ما لنا معنى
خليفة في البعد لا تطوّل الغيبات
من غيرك ترى والله خليفة نضيع
وما نلاقي أحد مثلك مع الأحباب يجمعنا
على حسك نعيش إحنا
نعم والله خليفة يا أطيب الطيبين
نحس الفرحة تتوهج إذا شفناك
خليفة يا سمو المجد
وما هو زود لو قلنا
ترى إحنا كل عمرنا فداك
وبنظل في العمر وياك
وبنصيد النعم في المد
ولا يهمنا صعب لو صار مثل السد
ترى اللي مراده عطر الورد
ما تهمه أبد الأشواك
خليفة النور
وألوان ألوفا اللي في الفضا منثور
وقت الصحوه أو في النوم
تأكد يا خليفة أن الوطن والله بغيابك
شعب واقف على بابك ويترياك
تذكر يا خليفة دوم
وتأكد يا خليفة دوم
إن إحنا على يمناك
شعر: علي الشرقاوي