هلا بك يا حبيبي العيد
هلا بصوتك
هلا بعينك
هلا باللي تمشى في الفضا
حالق
جديد الثوب
ومعطّر مثل لمحمدي صاعد من ألوانه
هلا يا أغلى من دانه
لها قلب البحر يضحك
ويتبسم بأعشابه ومرجانه
هلا يا ريحة بالايواد رويانه
أظن ما تدري إن الأرض
لك يا أقدس الأيام
شفقانه
وان الروح وين ما تروح
لك وحدك على طول العمر والله عطشانة
تريد تشم تعابيرك
وتتذوق تصاويرك
مثل طير الفجر بأنواره
زاحم ضحكته في دفوة أغصانه
هلا بك يا حبيبي العيد
احبك فارد جناحك
وتمشي تغسل الأحزان بأملاحك
وتخلي ابتسامتنا هواها يجدد أكوانه
حبيبي العيد
أنا اللي دوم ارترياك
حتى أنسى ما قبلك
وادري يا حبيبي العيد
ما في العمر مثلك
يعدّل خاطر المكسور
ويرفعه مثل ياهل رزي ويضمه باحضانه
ويسقي الكل
عود وصغير
مره ورجّال
عسل شوق المحبه
اللي عرفتها في سنين الغوص والقفّال شطانه
حبيبي العيد
يا معنى المعاني للحياه الحلوه
وشوق الطيب للطيبين
والفرحه إذا انسد في وجهها الباب
تفتح في الفضا ألفين
إحنا في الوطن
هذا الذي يحمل
هموم وحب
وأحلام الوطن كله
نهني كل قيادتنا بيوم العيد
نهني الغالي بو سلمان
ربان السفينه في بحر ألازمان
نهني بو علي الماسك
وسط موج المصاعب قوة السكّان
ونهني ولي عهد الأمل سلمان
نهني الشعب فرد وفرد
نهني المصلين اللي مزحومين في المسجد
نهني المسلمين كلهم فريب وبعيد
بيوم العيد
عسى الله يعدل الأحوال
ونتلاقى بفرح وأمال
ونعيش المحبه في ثرى ديره
أهاليها
وشوارعها وقهاويها
على طول العمر بالدنيا فرحانه.
علي الشرقاوي