هلت من إوكالة «بنا» بشرى لها كلٍ حمد
تحرى جهينه بالخبر، دام الخبر منها يقين
زان الخبر عين الخوي وإلا العدو جاه الرمد
كلٍ تكحل به.. عيون إتزين، وعيونٍ تشين
إبشارة اللي ما عمرها بشروها بالولد
يا بوعلي زانت بك الفرحة عسى عمرك يزين
الحر وإن يشكي من أمواسه إلى جاه الهدد
يصفق بجنحانه ودون الموت ياتي بالسمين
وإنت اللي ما تخضع سوى للخالق الفرد الصمد
تخفي الألم لين الألم يشكي خضوعه للأنين
هم البلد ينسيك عوقك كان جزرٍ وإلا مد
لين إستكانت نفسها عوقك يطيب ويستكين
ما همك إلا ونـــة البحريـــن ودمـــوع البلـــد
عزيتهــــا وأكرمتهــــا وأهديتهــــا درعٍ متيـــــن
كان المراجل يا خليفة سيف سيفك ما خمد
ناره تسلمت وإشرقت شمسٍ لها العالم تدين
إنت المصانع والوكاله والوكيل المعتمد
للسيف.. يا سيف الخليفه يا عظيم الوالدين
كل الفحوصات إنجحت وفحوصنا طول الأمد
مختومة بإخلاصنا وإموقعه لك باليمين
حط الطبيب اللي يشوفك، كان به جرح إنصمد
في شوفتك طب وطبيب عجّز المتخصصين
يا ضحكة البحرين يا روح إسكنت وسط الجسد
ما راحوا الطيبين دامك موطن للطيبين
في عينك اليمنى نشوف أجيال وعزوم وسند
وبعينك اليسرى نشوف إنخيل وشراع وحنين
ما ينهدم بيت المعزة دام راسك له عمد
يا شامخ الراس إنكتب حبك لنا فوق الجبين
شفناه ونبادل سموك حب مخلص ماجحد
وقفات قلبك يا كريم ما شكت منه اليدين
الله يمدك عافيه ونطلب من الله المـدد
يا بوعلي جوهر وجودك في محاجرنا ثميـن

ظما الوجدان