قصيدة مرفوعة إلى صاحب السموالملكي الأمير خليفة بن سلمان آل خليفة رئيس الوزراء بمناسبة العودة الميمونة لسموه الكريم

يا هنا البحرين بلحظة رجوعك
ياخليفة
يا كثر فرحة أهاليها بشمسك
انته نهر الخير والأفراح كلها
يا خليفه الحكمة العدله
يا صوت الناس
يا جذر الوفا والطيب
ما امتدينا في الأيام إلا من فروغك
وتحولنا رطب اخلاص زاهي في طلوعك
يا هنا البحرين بلحظة رجوعك
انته ما تدري اشكثر ضاقت عليها الدنيا
وانته بعيد تترياك مثل العيد
حتى بايدينها تلمسك
برجوعك
قرت عيون الشعب
وارتاح قلب الأرض في برها وبحرها
من كثر ما سهر يحاتيك
قول اشلون شعبك ما يحاتي
وهو من صوتك تكلم
وهو عنده لغة الحب اللي ما أظنها تترجم
وانته حق جروحه مرهم
يا هلا ف بيتك وبين اهلك خليفه
لا عدم صوتك
ولا عنا خلت نبضات قلبك
الخضر بالله وجاه المصطفى زاهي في دربك
والله والله يا خليفه
الحجي مهما كثر
ما يقدر يفسر معاني الحب
هاللي تزدحم في قلوب شعبك
يا هلا بك راجع الديره لنا سالم وغانم
ومتشوق تلاقي اهلك الطيبين وأحبابك وناسك
هاللييتريون يلمسون ريحة كفك البيضا
ويجبون بالحب على راسك
شنهو حال البيت لو غاب الابو عنه ليالي
شنهو حالات الأهل إن مر عليهم يوم
وما شافوك نور الدار يا أغلى غالي
ما أغالي يا خليفه
والله ما عمري أغالي
لو أقول لا تطول الغيبات
هالغيبات تتركنا مثل نخله يحاصرها العطش
يا خليفه
انته فينا نبضة الوجدان
انته ماي الورد في هالكون
و إحنا لك مرش
وشكثر نتعب بلا حسك خليفه
وشكثر نتعب بلا صوتك خليفه
وشكثر نتعب إذا ما نشوفك الحاضر
معانا في سوالفنا اللطيفه
وإحنا والله اليوم
فرحانين مثل العيد يسطع في سطوعك
يا هنا البحرين بلحظة رجوعك
شعر: علي الشرقاوي