نص - حمد الشهابي: خشبة المسرح عبارة عن مدينة البسيتين- أصوات أبواق سيارات متوقفه بالشارع ويبدو أن أصحابها قد ارتفع ضغطهم. الأول: (يخرج يده من السيارة صارخاً على السائق الذي أمامه) ما تمشي يا ريال.. حرك سيارتك! الآخر (1): “إشلون أمشي و جدامي حفرة لو يطب فيها فيل اختفى!!” الأول: “أه! وين إحنا؟ في سان فرانصيصكو!!؟” الآخر (1):( بغباء) لا! إحنا بعيد عن بابكو! إنت ضايع والا تسوي نفسك أهبل؟ إنت في البسيتين! الأول: ما صدق! عدموا الشارع و نتفوه؟ الآخر (1): ( ينزل من سيارته و يحادثه) مو بس عدموه و نتفوه! شاقينه شق!! ما تقدر تمشي يمين ما تقدر تمشي يسار.. محلك حلو! و اشرب قهر.. و خل دمك يفور الأول: ما نبي هذا كله خلنا نروح البيت مشي! الآخر (1): و آخلي السمج و اللحم والاغراض بسيارتي؟ الأول: تبرع بهم! تبرع مرة وحدة بحياتك يا بو هباش! الآخر (1): لا ؟؟ هم تسميني بو هباش؟ شاري السمج بربع راتبي!! و عندي كيسين سميت!! و رافعين قيمته وأكياس قمامة شاريها من السوق! الأول: بليه!! الأكياس ببلاش الآخر (1): إنت قولي شنو الحل في الشارع هذا؟ الأول: آنه مريت على كل شوارع البسيتين شفتهم الحالة حالة!! رجل آخر: يا جماعه ما تمشون السيد متعطل! الأول: يله خذا!! هذا متفرغ بعد! (يصرخ عليه) إنزل شوف بعينك إ شلون عدموا شوارع البسيتين.. ما خلو فيهم واحد يقولك طوف! الآخر (1): مريت شارع برادة أبو بكر؟ أو برادة شعيب؟ الأول: برادة أبو بكر سموها برادة شنو يبى! الآخر: و برادة شعيب اللى مشاهدة راعي السمبوسة راعيها ين وقعد! الأول: خلونا نرجع ريوس! الآخر (1): ( صارخا) إنشاء الله تبيني ارجع الى مدرسة الهداية ريوس!!؟ الأول: خلونا نروح صوب نادي البحرين! الآخر: لا يحوشك! الأول: زين صوب برادة جاسم! الآخر: هناك بتنتحر!! لا خلو شبك لا خلو حديد.. لا خلو توانكي ما حطوها هناك! و شوف الحفريات هناك على بيزه!!! الأول: ( بغباء) ليش؟ الآخر (1): آقولك البسيتين راحت عليها! صار قلبها ميت.. الأول: ( بهبالة) توفت؟! الآخر: جيف عبالك البسيتين بنية؟؟ الأول: لا بس.. آعرف ان المقبرة فيها! الآخر: زين ! و القصد! الأول: آقول يعني.. إذا البسيتين توفت خلونا ندفنها و نفتك! الآخر: ( يصرخ) زين خلونا نمر صوب الخباز غلوم جانكيز! الآخر (1): ( يضحك) ضحكتني و آنه معصب! الآخر : ليش؟ الآخر (1): غلوم من قد ما تم الخبز عنده و محد يشتريه بغه ينتحر قبل يومين الشارع صوبه مقصص! و لا عبين به لعبه التانغو! الآخر: أوهو!! الآخر (2): ( يظن أنه قام بسبه) أوهو إنت! الآخر: خلونه نطلع من ه الورطة.. ورانه ألف سيارة! شنسوي؟ الآخر (3): ( معلقاً) نطلع من صوب الآريف الآخر: هش!! الآخر (2): ليش تهشهشني! الآخر: لأن الآريف صار بيوت حكومة ما تقدر توصل لها الحين.. الآخر (3): أو .. وايد مشكلة! آخر: ( يصرخ) و الحكومة ( شلون) آخر: تطق إصبع! آخر (2): يا سلام.. القضية فيها رقص و شسالفة؟ آخر: نعم! القضية فيها رقص من القهر.. و تشييك الضغط و تعال حق السكر! آخر (1): تقصد الحكومة تبي الناس تموت و تدفنها بالمقبرة اللي في البسيتين؟ آخر: إنتو ليش تاكلون و تفلتون الطعام على البدو؟! الحكومة مالها ذنب! فيه مسؤولين عن ها لشغلات!! آخر (3): ( يضحك معلقاً) أكيد تقصد الكمبيوتر... الكمبيوتر! ماغيره هالنحيس! آخر: يعني ما نحاسب أحد!؟ آخر (5): حاسب الزمن! آخر: تقصد نصبر أكثر؟ آخر (6): (يصرخ) ما تقومون عن الطريج.. إمشو ... عندي ميت الجميع: (يضحكون معلقين) عندك ميت؟ عيل إبشر خير.. الميت بيخيس و انت بشوارع البسيتين!! راحت على الميت مسكين!