اسمعي ابيات شعرٍ قالها ..
شـــاعرٍ تبنــي تماثيلــه قصور
من قوافي أسرجت أبياتها ..
من خيالٍ خالطه صدق الشعور
لي فكر بوصاف طيفك ثم سها..
يبدع ابيـــاتٍ تورثها العصور
يــا بــلادٍ جوهـره سميتها..
صاغها الرحمن من طينٍ ونور
يا فتاة البيض انتي ملحها ..
و الحلا اللي كاسيٍ سمر الشعور
يا فتاةٍ غرد القمري لها ..
واعتزل من شافها كل الطيور
لو يمسك آدمي غيري انتها..
لو يشوفك عاقلٍ عقله يدور
نيرت عقلٍ و فيك امن الدها..
فيك حلم و طيب و الطبع الغيور
ســـمني يا عاذلــي مجنونها..
دام حظي صادفه فال السرور
وإلا مخمورٍ تجرع عشقها ..
لي صحى من سكرته راسه يفور
ردفها مع خصرها لكنها ..
واديٍ للغيـــر ممنـــوع المرور
شـــاقني ردفٍ جلـــيٍّ بالبها..
و الخصر فوقه كما دقّ النحور
مثل عودٍ ينثني في مشيها..
تستثير العاطفه بدر البدور
مارأت عيني جمالٍ مثلها ..
خشف ريمٍ يتعب القلب الصبور
مهـــرةٍ وإلا غــزالٍ كنــها ..
عفرةٍ لي شفتها البندق يثور
بالكرم كنها سحابٍ ساقها ..
ريح وسمي بأمر رحمنٍ غفور
ينعش اديار الخليفي سيلها ..
دار شيخٍ ترثة شيوخ العصور
من ذوابه وائليه صيتها ..
مثل كوكب في سما عزه يدور
الـــولا لـــه كلمــــةٍ غنيتها..
من صميم القلب من عمر الزهور
المراجل مالها إلا رجالها ..
بالمواقف سجلت فيه الحضور
هو حمد للمرجله بنيانها ..
وساسها اللي ضاربٍ مثل الجذور
لو يشين الوقت و الدنيا بها ..
مثل بوسلمان ما جاها قصور
والصعايب يا حمد حنا لها ..
لي بدى اللازم تحولنا صقور
نارد احياض المنايا انعلها ..
والرياض الزاهيه تصبح قبور
يا حمد أنتا ابوها و عمها ..
لي دنت سود الليالي بالنّذور
يا ســحابٍ مطــربٍ رعادها ..
انعشي قاعٍ على العايل جسور
انعشــي دارٍ بهـــا خيالهــا ..
والنواخذ راكبــه غــب البحور
احتوت شيعي و سني ارضها
والكنايس تصدع ابصوت الحبور
وارعدي ثم زلزلي من خانها ..
والمعاني صغتها بين السطور
واسلمي ثم سلمي من صانها..
بالسلام اللي حوى نفح العطور
يا ديار اسمي تخلد بإسمها ..
اسمحي لي لي بدر مني قصور
لو خطيت اليوم بندم بعدها
والعذر مسموح في بعض الامور
امسحي دمعٍ تزايد وبلها ..
دمعة التايب على خده طهور
عبدالله بن مجرن الكواري