حنا هل الجزلات لاقيل جزلات
نوفي وحق الغير فوقه نزودي
لنا على درب الأجاويد صولات
مما عطاها الله ربعي تجودي
خوينا يحشم ولو زل زلات
والضيف يكرم دون وضع الحدودي
دخيلنا مانرجعه دون فزعات
بالدم نوقف كلنا كالأسودي
واليا تردى في زمنا شنابات
نبقى على عهد الوفاء كالسدودي
حنا تعلينا على روس هامات
والمدح جانا دون دفع النقودي
والساس وهبه من إله السماوات
يقوله الحربي عريب الجدودي
يمدح به الي ما توفيهم جزات
حرب الحرايب، والفعايل شهودي
من دون قاصر في قبايل ولابات
نجدي انا وان قيل عني سعودي
وعيال عمي جايبين الصدارات
في المملكه، بأركانها والحدودي
وصلوا على الي مبلغٍ للرسالات
الهاشمي محمد نقي الوعودي

عبدالله عرفه الحربي