مناي العود يا البحرين
يا أحلى أسامي الأرض
يا لوز الندى فيها
مثل طعم بردي
ويا نون
من حبها اشهقت في النبض
وحنّت بالمحبة كل أثر طيبة أهاليها
ويا أهلي اللي اعشقهم
عدد ما تنفست لغيوم في وحشة لياليها
مناي العود
يا البحرين
يا حلم صباي
وتاريخي ويا احلى عناويني
وين ما اروح وألا اطير
اسمج يعبر انفاسي
ويسكن كل شراييني
يقول انتي هوى احلامي
ويقول انتي ضوا ايامي
ويقول انتي نغم اي حرف يتحرّك
وسط كل لهجتي وصوتي
ويرجّعني
الى اطوار تشكيلي وتكويني
انا لون الهوى ف قلبج
وكل شوق خضر مر في دجى سنيني
احبج حب ما مثله استوى اوصار
احبج حب من طاف العمر بحّار
احبج حب قلب الارض لللامطار
مناي العود
يا البحرين
احلم بح تشديني بهوى صدرج
من الايام و في روحج
تزرعيني
فرح مثل البحر يمتد بليا شروط
وترويني هوى عشاق
ما هو بالثرى مربوط
وتحبّيني دون شروط
مناي العود
يا البحرين
احبج حب يجري في مجاري الدم
احبج حب ما حس به بني ادم
واذا ما جيت اتنسم
اشوفه يفيض ويوصل اخر العالم
احبج حب لو ذاقه البحر مره
ترك املاحه في الغبه
وتابعني
لاجل اعطيه بسمه من طرف عيني
احب محمديج اللي
صعد بي قمة الاحساس
احبج والله احبج بلا مقياس
يا البحرين
يا حب ما انقسم نصين
يا روحي
وبعد جبدي
ونظري عيني
اذا هالناس سكنوا فيج
يكفي انج تسكنيني.
